Putuj sada pismo moje u krajeve draga naše
pozdravi mi svu rodbinu i matere, ke se plaše
Pozdravi mi sve kružere i glavice lipe moje,
pozdravi mi sve vršnjake, ki se sada za nas boje.
i divojke po balkunih, i njihove oči žive.
Pozdravi mi sve kantune i kamenje od gromače,
i zazibaj svaku zipku di kakovo dite plače.
Pozdravi mi sve težake, naše starce i mladiće,
svima reči: pokle zime vajka dojde pramaliće.
Sve je naše priko mora, kadigod su trde ruke,
sve je naše po svoj zemlji, ča ima kakove muke.
Pozdravi mi tihe drage i po pustih stranah pute,
samo kad na njih pomislin, oči mi se već zamute.
Ma kuraja, lipi moji, ne dajte se sebi znati,
da ne gleda tuje oko, kako vaše srce pati.
Mate Balota
Poezija